Nukus shahridagi soʻlim maskanlardan birida xalq xoʻjaligining turli sohalarida samarali mehnat qilgan nuroniylar bilan uchrashuv oʻtkazildi. Unda Qoraqalpogʻiston Respublikasi Joʻqorgʻi Kengesi raisi Amanbay Orinbayev soʻzga chiqib, nuroniylarni har tomonlama qoʻllab-quvvatlash, ularni maʼnaviy va moddiy ragʻbatlantirish borasida amalga oshirilayotgan keng koʻlamli ishlarga toʻxtaldi.

Taʼkidlanganidek, keksalarni eʼzozlash, ularga hurmat va ehtirom koʻrsatish xalqimizga xos azaliy qadriyatlardan hisoblanadi. Nuroniylarning mamlakatimizni yanada rivojlantirish, yurtdoshlarimizning farovon hayotini taʼminlash, jamiyatda barqarorlik, tinchlik va totuvlikni mustahkamlash, yoshlarni Vatanga sadoqat ruhida tarbiyalash yoʻlidagi fidokorona mehnatlari eʼtirof etiladi.

Oʻzbekiston Respublikasi Prezidentining 2017-yil 14-iyuldagi qarori bilan koʻp yillar davomida turli sohalarda halol va samarali mehnat qilgan nafaqa yoshidagi yurtdoshlarimiz, shuningdek, hayotini oilalar mustahkamligini saqlash, farzandlarni jamiyat oldida masʼuliyat, milliy va umuminsoniy qadriyatlarga hurmat, Vatanga muhabbat, istiqlol gʻoyalariga sadoqat ruhida tarbiyalash ishlariga bagʻishlagan onaxonlar “Mehnat faxriysi” koʻkrak nishoni bilan taqdirlanib kelmoqda.

Tadbirda bir guruh nuroniylarga “Mehnat faxriysi”, Qoraqalpogʻiston Respublikasi Joʻqorgʻi Kengesi Prezidiumi qarori bilan “Ardoqli nuroniy”, “Ibratli ayol” hamda “Vatan fidoyisi” koʻkrak nishonlari topshirildi.

Uchrashuv sanʼat va madaniyat xodimlari ijrosidagi konsert dasturi bilan davom etdi.

Gʻayrat OTAJONOV

“Xalq soʻzi”.