Ijtimoiy tarmoqlarda Boysun tumanidagi “M-25” koni hududida neft saqlovchi suyuqligi yer yuzasiga sizib chiqayotgani tasvirlangan videolar tarqaldi. Energetika vazirligi mazkur holat yuzasidan maʼlumot berdi.

Bildirilishicha, ushbu neft suyuqligi tarqalishining oldini olish maqsadida hudud atrofida hamda soy oʻzani boʻylab qoʻshimcha himoya hovuzlari barpo etilgan. Hozirda yigʻib olingan neft suyuqligi uzluksiz ravishda maxsus maydonga olib chiqilmoqda.

Maʼlum qilinishicha, u yerda hajmi 5 ming metr³ boʻlgan, maxsus izolyatsiyalangan 2 ta shlam hovuzi mavjud boʻlib, u neft suyuqligini xavfsiz saqlash hamda keyinchalik undan samarali foydalanish imkonini beradi.

“Barcha ishlar amaldagi sanoat va ekologik xavfsizlik talablariga toʻliq rioya etilgan holda olib borilmoqda”, deyiladi vazirlik xabarida.

Qoʻshimcha qilinishicha, neft suyuqligi namunasi boʻyicha tahlil ishlari olib borilmoqda. Uning natijalariga asosan qayta ishlash imkoniyatlari oʻrganiladi, geologik tadqiqotlar esa davom etmoqda.

Hozirgi kunda holat doimiy monitoringda boʻlib, neft suyuqligi jilovlangan. Dastlabki kunlarda chiqib kanalga oqqan neft suyuqliklarini tozalash ishlari olib borilayotganligi maʼlum qilindi. Holat boʻyicha qoʻshimcha maʼlumot beriladi.