Illyustrativ foto

Navoiy viloyatida joylashgan doʻkonlardan birida sotuvchi adashib, 20 ming soʻmlik mahsulot uchun 2 milliard soʻmlik chek urib yubordi. Bu haqda Adliya vazirligi xabar berdi.

Maʼlum qilinishicha, “N*S*2020” MChJga qarashli doʻkonga kirgan xaridor 2 dona qalampir xarid qilgan, sotuvchi esa ushbu mahsulot uchun 20 000 soʻmlik chek urish oʻrniga anglashilmovchilik sababli 2 000 000 000 soʻmlik chek urib yuborgan.

Shundan soʻng tadbirkor katta miqdordagi ortiqcha soliq qarzdorligi yuzaga kelgani hamda 2 milliard soʻmlik chekni bekor qilib berishni soʻrab, soliq boshqarmasiga murojaat qilgan. Biroq boshqarma chek maʼlumotlarini tahrirlab boʻlmasligini maʼlum qilingan.

Xatirchi tuman adliya boʻlimi tomonidan javobgar Navoiy viloyat soliq boshqarmasining 2025-yil 17-aprel kunidagi 7**9-sonli chekni tahrirlamaslik holati qonunga xilof deb topish yuzasidan Navoiy tumanlararo maʼmuriy sudga shikoyat kiritilgan.

Natijada soliq boshqarmasi mansabdor shaxslarining xatti-harakatlari qonunga xilof deb topilib, sudning hal qiluv qarori toʻliq tadbirkor foydasiga qabul qilingan.