NASA tarixda ilk bor kosmosda olingan “kamalak” tasvirini eʼlon qildi. Bu rang-barang surat AQSHning PUNCH (Polarimeter to Unify the Corona and Heliosphere) deb nomlangan yangi kosmik missiyasi doirasida olingan boʻlib, uchta alohida kamera tomonidan yuborilgan fotosuratlarni birlashtirish orqali yaratilgan. Bu haqda tashkilot oʻz saytida xabar berdi.

Bu tasvirda Quyosh atrofida aylanayotgan changʻ zarralarining murakkab yorugʻlik nurlari aks etgan. Ranglar yorugʻlikning kuch va yoʻnalishini ifodalaydi. Olimlarning bildirishicha, ushbu tasvir Quyosh shamolining harakati va yoʻnalishi toʻgʻrisidagi yangi maʼlumotlarni anglashda muhim manba hisoblanadi.

Maʼlumot uchun aytish mumkinki, PUNCH — NASAning birinchi 3D missiyasi boʻlib, Quyoshning tashqi qatlami qanday qilib shamolga aylanishini oʻrganadi.

Missiya doirasida toʻrtta kichik sunʼiy yoʻldosh Yerga yaqin orbitada harakatlanib, Quyosh atrofidagi zaryadlangan zarralar va magnit maydonlardan iborat himoya hududining toʻliq 3D tasvirini yaratishni maqsad qilgan.

NASA maʼlumotlariga koʻra, bu rasmlar nafaqat Quyosh shamolini oʻrganishga, balki PUNCH missiyasi kameralarining toʻgʻri ishlayotganini ham tasdiqlashga yordam berdi. Shuningdek, bu “kamalak” — PUNCH sunʼiy yoʻldoshlaridan biri tomonidan olingan uchta fotosuratni ketma-ket birlashtirish orqali yuzaga kelgan.

2025-yil mart oyida ishga tushirilgan ushbu missiya taxminan ikki yil davom etadi. Olimlar ushbu loyiha orqali Quyoshning tashqi muhiti, zaryadlangan zarralar harakati va ularning Yerga taʼsiri haqida yanada toʻliq tasavvurga ega boʻlishni maqsad qilishmoqda.

Mashhura BAXRINOVA tayyorladi.