Videodan kadr

Namangan viloyati Yangiqoʻrgʻon tumanida 36 yoshli ayol va uning 2 yashar farzandini qoramol suzib, tan jarohati yetkazdi. Viloyat Ichki ishlar boshqarmasi hodisa yuzasidan maʼlumot berdi.

Bildirilishicha, voqea joriy yilning 16-iyul kuni soat 18:47 da Yangiqoʻrgʻon tumani “Barkamol” mahallasida roʻy bergan. Ushbu mahallada yashovchi 1968-yilda tugʻilgan fuqaro A.O. qoramollarni boshqa hududdagi yer maydonidan yashash uyiga olib kelayotgan vaqtda, koʻchada oʻynab yurgan 2023-yilda tugʻilgan X.R. va uni himoya qilmoqchi boʻlgan onasi 1989-yilda tugʻilgan fuqaro A.D.ni suzib, tan jarohati yetkazgan.

Yangiqoʻrgʻon tumanlararo sud tibbiy ekspertizasining 22-iyuldagi xulosasida fuqaro A.D.ga oʻrtacha ogʻir va voyaga yetmagan R.X.ga yengil tan jarohati yetkazilgani koʻrsatilgan.

Respublika shoshilinch tibbiy yordam ilmiy markaz Namangan filialining maʼlum qilishicha, jabrlanuvchilarga shu yilning 18-iyul kuni yashash uyiga ruxsat berilgan, hozirda ular oʻz uyida ambulator sharoitda davolanmoqda.

Ayni paytda mazkur holat yuzasidan Yangiqoʻrgʻon tumani IIB tomonidan tergovga qadar tekshiruv oʻtkazilmoqda.