Ajiniyoz nomidagi Nukus davlat pedagogika institutida “Plato Books”, “Booky”, “Atiyaj” masʼuliyati cheklangan jamiyatlari va “Aydinlar” loyihasi tomonidan moliyaviy savodxonlik boʻyicha qoraqalpoq tiliga tarjima qilingan kitoblar taqdimoti boʻlib oʻtdi. Unda Bodo Sheferning “Pul alifbosi”, Jorj S.Kleysonning “Vavilonning eng boy odami”, Saidmurod Davlatovning “Men va pul” hamda “Tafakkur strategiyasi” kitoblari oʻquvchilar eʼtiboriga havola etildi.

Ustoz pedagoglar, kitobxon yoshlar, talabalar, keng jamoatchilik va ommaviy axborot vositalari vakillari ishtirok etgan tadbirni institutning yoshlar masalalari va maʼnaviy-maʼrifiy ishlar boʻyicha birinchi prorektori Quvondiq Qodirov kirish soʻzi bilan ochib berdi.

Yangi kitoblar taqdimotida sotsiologiya fanlari boʻyicha falsafa doktori Rustam Saparbayev, tadbirkor Azamat Kaypanov, “Booky” loyihasi asoschisi Azizbek Dabilov soʻzga chiqib, xalqimizning kitob oʻqishga boʻlgan qiziqishi, mutolaa madaniyatini oshirishga qaratilgan bunday tadbirlarning ahamiyati haqida toʻxtalib oʻtdi. Shu bilan birga, qoraqalpoq tilida chop etilgan kitoblarning mazmuni bilan tanishtirib, ulardan har bir inson shaxsiy hayotida foydalanishi mumkinligini taʼkidladi.

Tadbir yangi kitoblar yarmarkasi bilan davom etdi.

Gʻayrat OTAJONOV

“Xalq soʻzi”.