Bugun “Moʻynoqqa madad” ekologik xayriya velomarafoniga Andijon viloyatining Xonobod shahrida start berildi. Ekologik xayriya marafonini oʻtkazishdan maqsad mamlakatimizda velosportni ommalashtirish, yoshlarning sport bilan shugʻullanishi uchun zarur shart-sharoitlarni yaratish bilan bir qatorda Orolboʻyi hududida yashayotgan aholining turmush sharoitini yaxshilash hamda keng jamoatchilik eʼtiborini dolzarb ekologik muammolar yechimini topishga qaratishdan iborat.

— Ushbu tadbir oʻzining ezgu amali bilan xayrlidir, — deydi tadbir ishtirokchisi Sardorbek Sodiqov. — Respublikamizning eng chekka hududi boʻlmish Xonobod shahridan boshlangan velomarafon Qoraqalpogʻistongacha boʻlgan manzil boʻylab davom etadi. Bu shunchaki tadbir emas, balki, xalqimizga xos boʻlgan mehr-muruvvat ifodasidir.

Mazkur ekologik xayriya velomarafon doirasida jalb etilgan homiylik hamda xayriya mablagʻlari Moʻynoq tumani Ali-ovul qishlogʻini obod qilish bilan bogʻliq chora-tadbirlarni moliyalashtirishga yoʻnaltirilishi koʻzda tutilgan.

Saminjon HUSANOV,
“Xalq soʻzi”