Foto: AP

Argentinalik mutaxassis Maurisio Pochettino Angliyaning «Manchester Yunayted» futbol klubiga oʻtsa, jamoa PSJ (Fransiya)ga 12 million yevro toʻlashi mumkin. 

Maʼlumki, 21-noyabr kuni «Manchester Yunayted» Ole-Gunnar Sulsher jamoa bosh murabbiyligidan ketganini eʼlon qildi. Ayni paytda uning yordamchisi Maykl Kerrik bosh murabbiy vazifasini bajaruvchi etib tayinlangan.

Shu bilan birga jamoaga yangi bosh murabbiy ham qidirilmoqda. Ayni paytda jamoani boshqarishga PSJda bosh murabbiyi boʻlib faoliyat olib borayotgan Maurisio Pochettino nomzodi ilgari surilmoqda. Buyuk Britaniya OAV xabarlariga koʻra, argentinalik mutaxassis ingliz klubiga kelishi kutilmoqda. “The Sun” nashri xabariga koʻra, PSJ Pochettinoning transferini 12 million yevroga baholagan. Agar, Pochettino «Manchester Yunayted»ga yozda oʻtishga qaror qilsa, narx ikki barobar arzonlashadi. Argentinalik mutaxassisning PSJ bilan amaldagi shartnomasi 2023-yilgacha moʻljallangan. 

Maurisio Pochettino 49 yoshda va 2021-yilning yanvaridan beri PSJni boshqarib kelmoqda. Uning qoʻl ostida Parij klubi Fransiya kubogi va Superkubogini qoʻlga kiritdi. Bungacha Pochettino Ispaniyaning «Espanyol», Angliyaning “Sautgempton” va «Tottenxem» klublarida bosh murabbiy sifatida ishlagan.

Oldinroq, «Manchester Yunayted» klubining sobiq ustozi Ser Aleks Fergyuson ham jamoani Maurisio Pochettino boshqarishini istayotganini maʼlum qilgan edi.