Malayziya poytaxti Kuala-Lumpurda xalqaro turizm forumi boʻlib oʻtdi. Unda andijonlik hunarmandlar oʻzlarining betakror mahsulotlari bilan koʻrgazma tashkil etdi. Nozik qoʻl mehnati bilan yaratilgan sanʼat namunasi boʻlgan bu mahsulotlar xorijlik ishtirokchilarda katta qiziqish uygʻotdi.

Tadbir davomida Andijon viloyati vakillari sayyohlik sohasidagi mavjud imkoniyatlar, turli turistik yoʻnalishlar va xizmat turlari haqida atroflicha maʼlumot berdi. Qadim tarix, goʻzal tabiat va milliy anʼanalar uygʻunligi Andijonning turizm salohiyati qanchalik boy ekanini yorqin namoyon etdi. Forum maydonida sanʼatkorlar tomonidan milliy raqs va kuy-qoʻshiqlar ijro etildi. Bu orqali yurtimizning boy madaniy merosi namoyish qilinib, mehmondoʻstlik va yuksak maʼnaviyat oʻz ifodasini topdi.

— Garchi, oʻn yildan ziyod vaqt mobaynida turizm sohasida faoliyat olib borayotgan boʻlsamda, Oʻzbekiston haqida yetarli maʼlumotga ega emas ekanman, — deydi tadbir ishtirokchisi Fatin binti Karim. —Andijonliklar tomonidan tashkil etilgan koʻrgazma va sanʼatkorlar chiqishlaridan bildimki, bu yurtning boy madaniy va maʼrifiy tarixi bor. Shu bois kelgusida Oʻzbekiston va Malayziya davlatlari oʻrtasidagi sayyohlik aloqalarini rivojlantirishda munosib ishtirok etishni rejalashtirmoqdaman.

Shubhasiz, bunday xalqaro tadbirlarda qatnashish viloyatning sayyohlik imkoniyatlarini keng targʻib etishga, xorijiy hamkorlik aloqalarini mustahkamlashga va kelgusida turizm sohasini yanada yuksaltirishga xizmat qiladi.

Saminjon HUSANOV

“Xalq soʻzi”.