Saminjon HUSANOV/“Xalq soʻzi”. Andijon viloyatida koʻp qavatli uylarni qish mavsumiga tayyorgarligini taʼminlash boʻyicha samarali ishlar amalga oshirilmoqda. Jumladan, Andijon shahridagi “Qoʻshariq”, “Yashnobod”, “Binokor” va “Bunyodkor” mahallasidagi 75 ta koʻp qavatli turar-joylar qishki mavsumni betalafot oʻtkazishi uchun barcha sharoitlar yaratildi.

— Tayyorgarlik jarayonida 3 ta uyning eskirgan ichimlik suvi quvuri yangilandi, — deydi “Andijon suv taʼminoti” AJ bosh muhandisi Humoyun Alimov. — 12 ta uyning yertoʻlasi nazoratdan oʻtkazilib, oqava suv quvuridagi muammolar bartaraf etildi. Har bir xonadondagi suv joʻmraklarining ishlash tizimi koʻzdan kechirilib, aholi orasida targʻibot va tushuntirish ishlari oʻtkazildi.

Shuningdek, tabiiy gaz taʼminoti sifatini yaxshilash boʻyicha 8 ta tarmoq ustunlari va 500 metr quvur soz holatga keltirildi. 40 ta xonadondagi gaz jihozi texnik koʻrikdan oʻtkazildi. Ichki yoʻllarni asfaltlash va taʼmirlash uchun 25 tonna asfalt qoplamasi yotqizildi. Bu kabi saʼy-harakatlar viloyatdagi barcha koʻp qavatli uylarda davom etmoqda.