Foto: TIV matbuot kotibi

Sankt-Peterburg shahrida koʻp qavatli uyning yuqori qismidan pastga qulab tushayotgan yosh bolani qutqarib qolgan Ibadullayev Xayrullo Saydullayevichga “Jasorat” medali topshirildi. Bu haqda Tashqi ishlar vaziri matbuot kotibi xabar berdi.

Bildirilishicha, bugun, 26-fevral kuni Oʻzbekistonning Sankt-Peterburg shahridagi Bosh konsulxonasida ushbu mukofotni tantanali topshirish marosimi boʻlib oʻtgan. Unda mamlakatimizning Rossiyadagi Favqulodda va muxtor elchisi Botir Asadov, Sankt-Peterburg shahridagi Bosh konsulxona xodimlari, vatandoshlarimiz hamda Rossiya ommaviy axborot vositalari vakillari ishtirok etgan.

Marosimda Botir Asadov soʻzga chiqib, mazkur mukofot nafaqat bir insonning jasoratini eʼtirof etish, balki yurtdoshlarimizning insoniylik, bagʻrikenglik va yuksak maʼnaviy qadriyatlarga sodiqligini namoyon etuvchi muhim ramz ekanini qayd etgan.

Xayrulla Ibadullayev ushbu yuksak eʼtirof uchun Davlatimiz rahbariga minnatdorlik bildirib, bunday vaziyatda har bir oʻzbek farzandi bolaning hayotini saqlab qolish uchun shunday yoʻl tutishi tabiiy ekanini taʼkidlagan. Shuningdek, u oʻz harakatini qahramonlik emas, balki insoniy burch deb hisoblashini aytib, koʻrsatilgan yuksak ishonch va eʼtibor unga katta masʼuliyat yuklashini bildirgan.