Shahrisabz Davlat pedagogika institutida talaba-yoshlar uchun “Karyera kuni” mehnat yarmarkasi o‘tkazildi.

Joriy yilda mazkur institutni 280 nafar bakalavr hamda 152 nafar magistr bosqichidagi bitiruvchilar tamomlamoqda. “Karyera kuni” tadbirida viloyatdagi 14 ta tuman hamda 2 ta shahar maktabgacha va maktab ta’limi bo‘limlari mas’ullari ushbu bitiruvchilar bilan uchrashib, o‘zaro muloqot o‘tkazdi. Bo‘lg‘usi pedagoglarga viloyatdagi bog‘cha va maktablarda mavjud bo‘lgan 1100 dan ortiq vakant ish o‘rinlari haqida ma’lumot berildi. 

- Yakunda 137 nafar bitiruvchilarimiz o‘z mutaxassisligi bo‘yicha tegishli vakant lavozimlarda ishlashga rasman taklif qilindi, - deydi institutning axborot xizmati rahbari Charos Hamrayeva. - Shu bilan birga, 204 nafar bitiruvchilar bilan o‘quv amaliyoti o‘tash hamda kelgusida ishga joylashish bo‘yicha uch tomonlama shartnomalarni imzolandi. 

Tadbirda institut rahbariyati hamda ish beruvchilar o‘rtasida talaba-yoshlarning amaliyot o‘tash jarayonlarini samarali tashkil etish, ikki tomonlama tizimli hamkorlikni yo‘lga qo‘yish va shu kabi bir qator masalalar yuzasidan o‘zaro muloqot o‘tkazildi.

Jahongir BOYMURODOV, “Xalq so‘zi”