Koronavirus pandemiyasi davrida aholini ijtimoiy qoʻllab-quvvatlash, ehtiyojmand oilalarga muntazam ravishda xayriya yordamlarini koʻrsaiish maqsadida Sherobod tumanida ham homiylik xayriyalarini muvofiqlashtirish markazi faoliyat olib bormoqda. Xayriya tadbirlari doirasida yolgʻiz keksalar, jismoniy imkoniyati cheklangan va ishsiz fuqarolar, karantin tufayli doimiy daromaddan ayrilgan shaxslar hamda kam taʼminlangan oilalarga xayriya yordamlari koʻrsatilayapti.

Tumanning “Choʻyinchi”, “Qishloqbozor”, “Oltinvoha”, “Mihrobod”, “Sherobod”, “Gʻurjak-1”, “ Qulluqsho”, “Istiqbol” , “Oqtepa”, “Kattabogʻ”, “Nurtepa”, “Xoʻjaqiya-1”, “Oyinli”, “Uchyogʻoch” singari mahallalarida istiqomat qiluvchi 50 dan ortiq ijtimoiy himoyaga muxtoj oilalarga kunlik ehtiyoj uchun zarur oziq-ovqat mahsulotlari tegishli sanitariya-gigiyena qoidalariga binoan ularning yashash manzillariga yetazib berildi. Bu boradagi xayriya ishlarini tez va muntazam amalga oshirish uchun 12 ta “Damas” avtomashinasi ajratilgan. Xayriya tadbirlari eng olis hududlarni ham qamrab olayotgani bilan ahamiyatlidir. Navbatdagi aksiya doirasida tuman markazidan qariyb 50 kilometr olisda joylashgan togʻli “Poshhurt” mahallasi aholisi ham bunday eʼtibordan chetda qolmadi.

Ilhom Rahmatov, 
“Xalq soʻzi” muxbiri.