Qonun (OʻRQ–1116-son, 04.02.2026-y.) bilan Maʼmuriy javobgarlik toʻgʻrisidagi kodeksga qoʻshimcha va oʻzgartirishlar kiritildi. Bu haqida «Huquqiy axborot Telegram-kanali xabar berdi.

Unda aytilishicha, yoʻl harakati xavfsizligi bilan bogʻliq kam ahamiyatli huquqbuzarliklar uchun maʼmuriy ogohlantirish jazosi qoʻllanilishi belgilangan.

“Maʼmuriy ogohlantirish huquqbuzarlik sodir etgan shaxsni qonunga xilof xatti-harakatlarga yoʻl qoʻymaslik toʻgʻrisida ogohlantirgan holda unga rasmiy tanbeh berishdir. Maʼmuriy ogohlantirish yozma (elektron) ravishda qoʻllaniladi”, — deyiladi xabarda.

Maʼmuriy ogohlantirish Kodeks 125-moddasining 1- va 2- qismlarida, 128 (prim 1), 128 (prim 2), 128 (prim 6), 135 (prim 1)-moddalari hamda 138-moddasi 1- va 2-qismlarida nazarda tutilgan huquqbuzarlikni sodir etgan shaxslarga nisbatan qoʻllaniladi.

Bunda shaxs oʻz qilmishidan chin koʻngildan pushaymon boʻlganda, shuningdek Kodeksda nazarda tutilgan boshqa huquqbuzarliklar alomatlari boʻlmaganda, maʼmuriy jazo chorasini qoʻllashga vakolatli organ tomonidan qoʻllaniladi. Maʼmuriy ogohlantirish ayni bir shaxsga nisbatan 1-yil davomida 1-martadan ortiq qoʻllanilishi mumkin emas.