2025-yil yanvar oyida Oʻzbekiston boʻylab 959 ta yirik soliq toʻlovchilar tomonidan jami 8,5 trillion soʻmdan ortiq soliq toʻlangan. Bu koʻrsatkich mamlakat iqtisodiyotida eng yirik korxonalar tomonidan amalga oshirilayotgan toʻlovlar hajmi va ularning davlat byudjetiga qoʻshayotgan hissasini aks ettiradi.

Davlat ulushi mavjud TOP-10 yirik soliq toʻlovchilar umumiy hisobda 4,5 trillion soʻm soliq toʻlagan. Ushbu reytingda “Navoiy kon-metallurgiya kombinati” AJ 2,08 trillion soʻm soliq toʻlab, birinchi oʻrinni egallagan. Ikkinchi oʻrinda “Olmaliq kon-metallurgiya kombinati” AJ 639,1 milliard soʻm toʻlov bilan qayd etilgan. “Oʻzkimyosanoat” AJ esa 388 milliard soʻm soliq bilan uchinchi oʻrinni band qilgan. Shuningdek, “Oʻzbekneftgaz” AJ (279,8 milliard soʻm), “Navoyuran” AJ (298,5 milliard soʻm) va boshqa yirik davlat ulushiga ega korxonalar roʻyxatda yuqori oʻrinlarni egallagan.

Xususiy sektordagi TOP-10 yirik soliq toʻlovchilar jami 1,3 trillion soʻm soliq toʻlagan. Ushbu roʻyxatda “UZBAT” AJ QK 182 milliard soʻm soliq bilan birinchi oʻrinni egallagan. Ikkinchi oʻrinni “ADM Jizzakh” MCHJ (62,2 milliard soʻm) egallagan boʻlsa, uchinchi oʻrinda “Epsilon Development Company” MCHJ XK 50,6 milliard soʻm soliq bilan qayd etilgan. Shuningdek, “Kapitalbank” ATB (48 milliard soʻm), “Unitel” MCHJ XK (47,6 milliard soʻm), “Tashkent Tobacco” MCHJ (42,3 milliard soʻm) va boshqa xususiy kompaniyalar ham yirik soliq toʻlovchilar qatoridan joy olgan.

Umuman olganda, TOP-20 yirik soliq toʻlovchilar mamlakat boʻylab yirik soliq tushumlarining 60 foizini taʼminlagan. Ushbu koʻrsatkich yirik korxonalar tomonidan davlat byudjetiga qoʻshilayotgan ulkan hissani aks ettirib, ularning iqtisodiy barqarorlikdagi oʻrnini yana bir bor tasdiqlaydi.