Bosh prokuratura huzuridagi Departamentning Mingbuloq tumani boʻlimi tomonidan tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unga koʻra, oʻtkazilgan tezkor tadbir davomida fuqaro T.Sh. “GENTRA” rusumli avtomashinada tegishli hujjatlari boʻlmagan umumiy bahosi 196 million soʻmlik xorijda ishlab chiqarilgan 800 dona elektron tamaki mahsulotini Chust tumanida sotish maqsadida olib ketayotgan vaqtida ushlangan.

Mazkur holat tezkor tadbir xodimlari tomonidan nazoratga olinib, ushbu mahsulotlar ashyoviy dalil sifatida olib qoʻyildi.

Shu kabi yana bir holat, Departamentning Qashqadaryo viloyati boshqarmasi, IIB va bojxona xodimlari hamkorligida oʻtkazilgan tezkor tadbirlarda ham aniqlangan.

Maʼlum boʻlishicha, “N.T.” MCHJ rahbari K.N. va “N.I.” MCHJ rahbari U.Sh.larning savdo doʻkonlaridan umumiy bahosi 99,2 million soʻmlik jami 203 dona qalbaki aksiz markali alkogol hamda 4 ming 436 quti aksiz markasiz tamaki mahsulotlari aniqlanib, tezkor tadbir xodimlari tomonidan ashyoviy dalil sifatida rasmiylashtirilgan.

“Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qogʻozlar yasash, ularni oʻtkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi Departament xabarida.