Jizzax viloyatining Baxmal tumanida opa-singilning oʻlimiga sababchi boʻlgan Cobalt haydovchisiga hukm oʻqildi. Bu haqda IIV matbuot xizmati xabar qildi.

Avvalroq, 2 nafar bolalarni urib, qochib ketgan haydovchiga jinoyat ishi qoʻzgʻatilgani haqida xabar qilingandi.

Maʼlum qilinishicha, holat 2024-yilning 18-noyabr kuni soat 19:30 atrofida Jizzax viloyati Baxmal tumanida sodir boʻlgan. 1991-yilda tugʻilgan “Cobalt” mashinasi haydovchisi yoʻlning belgilangan qismidan kesib oʻtayotgan 2011-yilda tugʻilgan I.M. va uning singlisi, 2020-yilda tugʻilgan I.K.larni urib yuborib, bolalarga yordam berish oʻrniga, voqea joyidan juftakni rostlagan.

Ushbu YTH oqibatda opa-singillar turli ogʻir tan jarohatlari olib voqea joyida vafot etgan.

Mazkur holat yuzasidan ish Baxmal tuman sudida koʻrib chiqildi. Sud hukmiga koʻra, haydovchi 3-yil muddatga avtotransport vositalarini boshqarish huquqidan mahrum etilib, unga nisbatan 9-yil-u 6 oyga muddatga ozodlikdan mahrum qilish jazosi tayinlandi. Bundan tashqari, jabrlanuvchining foydasiga 145 million soʻm maʼnaviy va moddiy zarar toʻlanishi belgilangan.