Rustam Samandarov Olot tumanidagi “Chovdur” mahallasining old tadbirkorlaridan. Qish – qirovli shu kunlarda uning chorva fermasidagi binolardan birida yam-yashil maysalar barq urib oʻsayapti. Buni koʻrgan kishi dafʼatan ajablanishi mumkin. Ammo hayron boʻlarli joyi yoʻq. Ishbilarmon maxsus binoda donni namlatgan holda gidroponika usulida yashil ozuqa yetishtirishmoqda.

Hisob-kitoblarga qaraganda, bir kilogramm bugʻdoydan yetti kilogramm “yashil ozuqa” yetishtirish mumkin. Atigi yetti- sakkiz kunni talab qiladigan bu usul sharofati bilan oʻnlab gektar ekin maydonini, suvni tejab qolish imkoniyati yuzaga kelayapti. Negaki, gidroponikada suv ekinning ildiz qismiga berilsa, kifoya. Qolaversa, bunday usulda yetishtirilgan ozuqa juda toʻyimli. Uning chorva mollarida hazm boʻlish darajasi 90 – 95 foizni tashkil etadi. Boshqacha aytganda, ozuqa nishxoʻrdga chiqmaydi.

Aytmoqchi, R. Samandarovning fermasida “Arashan” zotiga mansub 100 boshdan ziyod qoʻy boqilayapti. Ularning biz koʻrib odatlangan qoʻylardan farqi shundaki, ular ikki yil davomida uch bor qoʻzilaydi. Shunday zotli uch oylik qoʻzining bozordagi bahosi esa toʻrt million soʻmdan kam emas.

Istam IBROHIMOV, “Xalq soʻzi”.