Muborak Ramazon oyida toʻgʻri ovqatlanishga alohida eʼtibor berish lozim. Kun davomida uzoq soatlar davom etadigan ochlikdan soʻng, turli taomlarga boy iftorlik dasturxonida koʻpincha tartibsiz ovqatlanish kuzatilishi mumkin. Oqibatda oshqozon-ichak tizimiga ortiqcha yuk tushadi va organizmda noqulayliklar yuzaga keladi.

Shu sababli Ramazon oyida toʻgʻri va muvozanatli ovqatlanish qoidalarini bilish hamda ularga amal qilish nihoyatda muhimdir. Sogʻlom ratsion nafaqat roʻzani yengil oʻtkazishga, balki umumiy salomatlikni saqlashga ham xizmat qiladi.

Sanitariya-epidemiologiya qoʻmitasi Ramazon oyida sogʻlom ovqatlanish va oshqozon-ichak tizimi salomatligini asrash uchun quyidagi tavsiyalarga eʼtibor qaratish lozimligini taʼkidladi:

Taomlanishni xurmodan boshlang

Xurmo — bu roʻza paytida kun davomida energiya bilan taʼminlaydigan uglevodlarning manbai hisoblanadi. Xurmo mevasi tolalari ovqat hazm qilish traktining ishlashini tartibga soladi. Bundan tashqari, xurmo magniy va kaliyga boy.

Koʻp miqdorda suv iching

Kun davomida chanqamaslik uchun ogʻiz ochilgandan keyin va saharlikdan oldin yetarlicha suv iching. Bir kunda 8 stakan suv ichishga harakat qiling.

Chanqatadigan ovqatlar va mahsulotlardan saqlaning

Tuzli ovqatlar, konservalar, tuzlangan yongʻoqlar, bodringlar, baliqlardan saqlaning. Bundan tashqari, ziravorlarga boy ovqatlardan saqlaning, chunki ular sizda chanqoq hissini chaqiradi. Koʻproq meva va sabzavotlarni isteʼmol qiling, ular organizmning suv zaxiralarini yangilaydi va toʻldiradi.

Sekin, shoshmasdan iftorlik qiling

Uzoq muddatli ochlikdan soʻng, tanaga katta miqdordagi oziq-ovqat tushishi – stressdir. Moʻtadil boʻlishga harakat qiling, iftorni xurmo, suv bilan boshlang, keyin shoʻrva, salat yeyishingiz mumkin. Bir muncha vaqt oʻtgach, asosiy taomga oʻting. Ortiqcha ovqatlanish ovqat hazm qilishda muammolar va oshqozon ogʻrigʻiga sabab boʻlishi mumkin. Iftorni iliq shoʻrva bilan boshlash roʻza tutgandan keyin eng yaxshi ovqat boʻlib, organizmning ozuqaviy moddalarini toʻldiradi va tanani ogʻirroq ovqatlar uchun tayyorlaydi.

Taomingizda barcha kerakli nutriyentlar mavjudligiga ishonch hosil qiling

Iftorda oqsillar, sabzavotlar, yormalar, mevalar va foydali yogʻlar kabi ovqatlar boʻlishi kerak.

Sogʻlom ovqatlarni tanlang

Ratsioningizda don, yormalar, tovuq goʻshti, yogʻsiz goʻsht, baliq, zaytun moyi va mevalar boʻlishi kerak. Qovurilgan, shoʻr va yogʻli ovqatlardan saqlaning. Goʻsht, dukkaklilar, tuxum va sut mahsulotlari oqsilga boy. Ushbu oziq-ovqat mahsulotlaridan kamida bittasini har kuni isteʼmol qilishingiz kerak.

Shirinliklardan saqlaning

Iftordan keyingi shirinliklar qorinda gaz toʻplanishiga sabab boʻladi va ovqat hazm qilishni buzadi. Bundan tashqari, u qondagi glyukoza miqdorini oshiradi, bu esa shirinliklarga boʻlgan ehtiyojni yanada oshiradi. Shuning uchun iftorlikdan 2–3 soatdan keyin shirinliklarni isteʼmol qilish tavsiya etiladi. Shirinliklarni foydaliroq mahsulotlarga: xurmo, quruq mevalar, shirin mevalar bilan almashtirish kerak.

Qahva (kofe) ichishdan tiyiling

Ramazon oyida bosh ogʻrigʻi va uyqusizlikka yoʻl qoʻymaslik uchun kofe isteʼmol qilishni kamaytirishga harakat qiling.

Ratsionga eʼtibor qarating

Asosiy ovqatlanishingizni uch qismga boʻling. Uchdan bir qismi murakkab uglevodlar, uchdan biri yogʻsiz goʻsht yoki baliq, qolganlari esa sabzavot. Bu sogʻlom muvozanatli ovqatlanish boʻladi.