Odilbek Odamboyev/“Xalq soʻzi”. Oʻtgan yil Xorazm viloyatida barcha dasturlar doirasida 1175 km avtomobil yoʻllarida 515 mlrd soʻmlik taʼmirlash ishlari bajarildi. Jumladan, “Mening yoʻlim”, “Tashabbusli byudjet” loyihalari asosida shuningdek, “Obod xonadon, obod koʻcha, obod mahalla” mezonlari asosida amalga oshirilgan chora-tadbirlar natijasida koʻplab mahallalardagi yoʻllar asfalt qilindi. Ichki xoʻjalik yoʻllariga qum-shagʻal aralashmasi yotqizildi.

Ichki yoʻllarni taʼmirlash ishlari boshlanishi munosabati bilan Bogʻot tumanida oʻtkazilgan koʻrgazmali seminarda soha mutaxassislari, “Mahalla yettiligi” vakillari ishtirok etdi. Tumanda bu yil jami 90 km uzunlikdagi yoʻllarga asfalt yotqizish va shagʻallashtirish rejalashtirilgan.

— Ichki yoʻllarni taʼmirlash xalqni rozi qiladigan muhim masalalardan biri hisoblanadi, — deydi “Nuroniy” jamgʻarmasi Bogʻot tuman boʻlimi raisi Xudoyor Omonov. — Aholi murojaatlaridan kelib chiqib, eng taʼmirtalab yoʻllar tanlab olindi. Bu ishlar yakuniga yetgach, tumandagi qator mahallalar aholisi, piyodalar va avtotransport vositalarining erkin harakatlanishi uchun qulay sharoit yaratiladi.