Oʻz davrining ulugʻ allomalaridan boʻlgan maʼrifatparvar inson Isʼhoqxon Junaydullaxoʻja oʻgʻli Ibratning bundan 120-yil avval amalga oshirgan ezgu ishlarining eʼtirofi sifatida u tugʻilib oʻsgan Toʻraqoʻrgʻon shahrida roʻyobga chiqarilgan xayrli tadbirlardan butun Oʻzbekiston ahli voqif. Xususan, Davlatimiz rahbari tashabbusi bilan bu yerda barpo etilgan muhtasham Xotira majmuasi, undagi koʻrkam bogʻ va xiyobon, tillar maktabi hamda boshqa inshootlar bugungi avlodning tabarruk insonga ehtiromi nishonasidir. Yurtimiz kinoijodkorlari tomonidan yaratilgan “Ibrat” badiiy filmi esa oʻz hayotini ilm-fan, madaniyat va maʼrifat taraqqiyotiga bagʻishlagan bobomiz xotirasini abadiylashtirish borasidagi navbatdagi qadam boʻldi. 

Kecha Toʻraqoʻrgʻonda «Oʻzbekkino» Milliy agentligi buyurtmasiga binoan «Kinomaniya» studiyasi tomonidan suratga olingan mazkur filmining tantanali taqdimoti tashkil etildi. Uning ishtirokchilari dastlab majmuadagi Isʼhoqxon toʻra Ibrat haykali poyiga gullar qoʻydilar. Shundan soʻng tuman markazidagi “Shirinlik” madaniyat saroyida yangi film ilk bor namoyish qilindi.

Taqdimot chogʻida soʻz olgan «Oʻzbekkino» Milliy agentligi direktori Firdavs Abduholiqov, agentlik direktori oʻrinbosari Shuhrat Rizayev, rejissyor Jahongir Qosimov, aktyor Matyoqub Matchonovlar filmni suratga olish jarayoni, ijodkorlarning Ibrat domlaning chinakam maʼrifatparvar va ulugʻ ustoz boʻlganligini ochib berish yoʻlidagi saʼy-harakatlari xususida gapirdilar.

Aytish lozimki, yangi film uning ilk tomoshabinlari, jumladan, Isʼhoqxon toʻra Ibratning avlodlari tomonidan zoʻr quvonch bilan kutib olindi.

— Filmni koʻrgan tomoshabin bobomizning oʻz zamondoshlari hayotiga yuksak madaniyat, maʼrifatni olib kirish uchun jonini-da ayamagan fidoyi inson boʻlganligini darrov sezib oladi,-deydi Ibratning chevarasi Ismoilxoʻja Sulaymonov. — U kishi boshlagan maʼrifatparvarlik ishlari, millat maʼnaviyatini yuksaltirish orzulari bugungi avlod hayotida roʻyobini topayotgani barchamizni quvontiradi. Tarixiy filmni maromiga yetkazib suratga olgan kinoijodkorlargaIsʼhoqxon Ibrat avlodlari, butun toʻraqoʻrgʻonliklar nomidan minnatdorchilik bildiraman.

“Ibrat” badiiy filmi taqdimotida Namangan viloyati hokimi Sh. Abdurazzoqov ishtirok etdi.

Qudratilla NAJMIDDINOV,
“Xalq soʻzi”.