Fors koʻrfazidagi vaziyat sabab Janubiy Koreyaning muhim taʼminotini taʼminlaydigan kamida yettita neft tankeri Hoʻrmuz boʻgʻozidan oʻta olmayapti. Bu haqda Janubiy Koreya qonun chiqaruvchi idorasi rahbari Kim Yong Bae payshanba kuni CNN telekanaliga bergan intervyusida maʼlum qildi.

Kim bu haqda parlament aʼzolari va Samsung Electronics, Hyundai Motor, LG, HD Hyundai Oil Bank, SK, GS Caltex va Hanwha Ocean kabi yirik sanoat ishtirokchilari bilan favqulodda yigʻilishdan soʻng aytdi.

Eron dunyo neftining 20 foizi oʻtadigan Hoʻrmuz boʻgʻozidan oʻtishga urinayotgan har qanday kemaga hujum qilish bilan tahdid qildi. Kim Janubiy Koreyaga ketayotgan millionlab barrel xom neft tashiyotgan kemalar tiqilib qolganini va bu taʼminot tanqisligi xavfini tugʻdirayotganini aytdi. Shuningdek, u hukumatni energiya xavfsizligini mustahkamlash uchun choralar koʻrishga undagan.

Koreya xalqaro savdo assotsiatsiyasi maʼlumotlariga koʻra, mamlakat xom neftining 70 foizdan ortigʻi va gaz importining qariyb 20 foizi Yaqin Sharqdan keladi. Janubiy Koreya prezidenti Li Chje Myon payshanba kuni vazirlarni xom neft va gaz taʼminotini barqarorlashtirish uchun shoshilinch choralarni tezda amalga oshirishga chaqirdi.

“Dunyo tobora ortib borayotgan noaniqlikka duch kelayotgan bir paytda, energiya taʼminoti, import va eksportdagi uzilishlar sanoat hamda kengroq iqtisodiyot uchun jiddiy qiyinchiliklar tugʻdirishi kutilmoqda”, — dedi Li favqulodda vazirlar mahkamasi yigʻilishida.