Hindiston harbiy-dengiz kuchlari mintaqadagi keskin vaziyatga qaramay, Hoʻrmuz boʻgʻozi orqali ikkita suyultirilgan gaz tankerini kuzatib borishdi.

Times of India nashriga koʻra, gap Hindiston sanoati uchun yoqilgʻi tashiydigan Hindistonning “Shipping Corporation” davlat kompaniyasining kemalari haqida ketmoqda.

Yana bir hind tankeri Fors koʻrfazi hududida qolgan va harbiy kema himoyasida. Jurnalistlarning soʻzlariga koʻra, eskort Hindiston 2019-yilda mintaqadagi savdo kemalarini himoya qilish uchun boshlagan “Sankalp” operatsiyasi doirasida amalga oshiriladi. Operatsiyada dengiz floti kemalari va aviatsiya ishtirok etadi. Fors koʻrfazi davlatlari hududida bir necha oʻnlab hind kemalari va minglab harbiy xizmatchilar bor.

Hindiston dunyodagi eng yirik neft isteʼmolchilaridan biri hisoblanadi va energiya importiga juda bogʻliq, Shuning uchun Hoʻrmuz boʻgʻozi orqali yuk tashish xavfsizligi mamlakat uchun muhim ahamiyatga ega.

Maʼlumot uchun, Hoʻrmuz boʻgʻozidagi vaziyatni xavfsiz saqlash uchun AQSH prezidenti koalitsiya tuzish payida va koʻplab davlatlar unga qoʻshilishdan bosh tortgan. Jumladan, Hindiston ham yakka oʻzi tankerlarini himoya qilishini bildirgan. Hozirda mintaqadagi AQSH va Isroil hujumlari sabab Eron boʻgʻozni yopib qoʻygan.