Illyustrativ foto

Rossiya taʼsir oʻtkazish uchun uzoq muddatli geosiyosiy kurashda gʻalaba qozonmoqda. Xuddi shunday nuqtayi nazarni “Bloomberg” yozmoqda.

Manbaga koʻra, sanksiyalar Rossiya iqtisodiyotiga zarar yetkazgan, biroq bu bilan Vashington strategik maqsadlariga erisha olmagan.

Maqolada aytilishicha, Moskva Koreya Xalq Demokratik Respublikasi, Eron va Xitoy bilan hamkorlikni mustahkamlagan, muqobil toʻlov tizimlari orqali dollarning rolini pasaytirgan. Bundan tashqari, Rossiya AQSHning Afrika va Yaqin Sharqdagi pozitsiyasini zaiflashtirgan.

“Bloomberg”ning qoʻshimcha qilishicha, Oq uyning Ukraina inqirozi boʻyicha dastlabki strategiyasi AQSH pozitsiyasining zaifligini koʻrsatgan.

Bir kun avval AQSH Davlat departamenti matbuot xizmati rahbari Temmi Bryus Qoʻshma Shtatlar Rossiya va uning savdo hamkorlariga qarshi yangi sanksiyalar joriy etilishining barcha mumkin boʻlgan salbiy oqibatlarini, shu jumladan, Qoʻshma Shtatlarning oʻz manfaatlariga zarar yetkazishi mumkinligini hisobga olganini aytgandi.

Uning qoʻshimcha qilishicha, AQSH prezidenti Donald Tramp oʻz-oʻzidan qarorlar qabul qilmaydi va bunday oqibatlar, jumladan, Vashington manfaatlariga zid boʻlgan oqibatlar boshidanoq eʼtiborga olingan.