Ayni kunlarda yurtimizda “Vatanparvarlik oyligi” hamda Oʻzbekiston Respublikasi Qurolli kuchlari tashkil etilganining 34 yilligini munosib kutib olish maqsadida keng qamrovli tadbirlar oʻtkazilmoqda.

Sharqiy harbiy okrug xizmatchilari tomonidan Fargʻona viloyati boʻylab tashkil etilayotgan rang-barang bayram tadbirlari ishtirokchilarda unutilmas taassurotlar qoldirmoqda.

Ishlab chiqilgan chora-tadbirlar rejasiga muvofiq, kuni kecha Yozyovon tumanidagi madaniyat va istirohat bogʻida Sharqiy harbiy okrug harbiy xizmatchilari bilan yuzma-yuz uchrashuv tashkil etildi. Nuroniylar, yoshlar hamda keng jamoatchilik jamuljam boʻlgan tadbirda Vatanni madh etuvchi qoʻshiqlar, vatandoshlik ruhidagi musiqalar yangradi. Harbiylarning chiqishlari ishtirokchilar tomonidan katta olqishlar bilan qarshi olindi.

Shuningdek, tadbir doirasida tuman markazida joylashgan Mustaqillik koʻchasi boʻylab harbiy xizmatchilarning tantanali yurishi boʻlib oʻtdi. Unda kattayu kichik faol ishtirok etib, xalq va armiya oʻrtasidagi yakdillik va birdamlikni yana bir bor namoyon etdilar.

— Bunday tadbirlardan koʻzlangan asosiy maqsad — aholi, ayniqsa, yoshlar oʻrtasida vatanparvarlik tuygʻusini yanada yuksaltirishdir, — deydi Yozyovon tumani hokimi oʻrinbosari Sheroz Mirzaaliyev. — Uchrashuv davomida ikki tomonlama samimiy muloqot yoʻlga qoʻyildi. Yoshlarda harbiylikka qiziqish uygʻotish maqsadida Milliy armiyamiz salohiyati, jangovar tayyorgarlik jarayonlari namoyish etildi.

Tadbir davomida harbiylar ishtirokida sport musobaqalari va milliy oʻyinlar tashkil etilib, yoshlar mardlik va jasorat saboqlaridan bahramand boʻlishdi. Shu orqali ularga harbiy hayotni yaqindan his etish imkoniyati yaratildi.

Aytish joizki, bugungi kunda Fargʻona viloyatining barcha shahar va tumanlarida “Milliy armiya — ona yurt qalqoni, tinchligimiz posboni” shiori ostida ana shu kabi maʼnaviy-maʼrifiy tadbirlar izchil davom etmoqda.

Botir MADIYOROV, “Xalq soʻzi”.