Foto: Videodan kadr

Ijtimoiy tarmoqlarda bir yigit avtomobil lyukidan tanasini chiqarib, pul sochgani tasvirlangan video tarqaldi. Mazkur holat yuzasidan Fargʻona viloyat IIB munosabat bildirdi. https://t.me/fviib_uz/18414

Qayd etilishicha, holat Fargʻona viloyati Beshariq tumanida sodir boʻlgan boʻlib, voqea yuzasidan toʻplangan hujjatlar Jinoyat ishlari boʻyicha Beshariq tumani sudida koʻrib chiqilgan.

Manbaga koʻra, sud hukmi bilan pul sochgan yigit Maʼmuriy javobgarlik toʻgʻrisidagi kodeksning 183-moddasida (mayda bezorilik) nazarda tutilgan huquqbuzarlikni sodir etgan deb topilgan. Unga nisbatan 10 sutka maʼmuriy qamoq jazosi tayinlangan.

Sud davomida ayblanuvchi qilgan ishidan pushaymon ekanligini bildirgan.

“Akamning toʻyida kortejda lyukdan chiqib pul sochgandim. Xatti-harakatim notoʻgʻriligini tushuntirishdi. Qilgan ishimdan qattiq pushaymonman.  Tengdoshlarimga ham tavsiya qilmayman”, degan u.