Videodan kadr

Fargʻonada avtomashinaning yoqilgʻi bakida 11 kilogrammdan ziyod narkotik moddalarni yashirincha olib kirishga urinish fosh etildi. Bu haqda Bojxona qoʻmitasi matbuot xizmati xabar berdi.

Maʼlum qilinishicha, Fargʻona viloyati bojxona boshqarmasi “Ravot” chegara bojxona postida qoʻshni davlatdan kirib kelgan fuqaro boshqaruvidagi “Lacetti” avtotransport vositasi belgilangan tartibda bojxona koʻrigidan oʻtkazilgan.

Bojxona nazoratining texnik vositalari koʻmagida oʻtkazilgan koʻrik davomida avtomashinaning yoqilgʻi bakiga shubhali jismlar yashirilganligi aniqlangan. Shundan soʻng belgilangan tartibda va xolislar ishtirokida ushbu bak ochib koʻrilganida, uning ichiga 6945 dona “Royal” nomli kuchli taʼsir qiluvchi dori vositalari hamda 3 turdagi giyohvandlik vositalari yashirilgani maʼlum boʻlgan.

Jumladan, 10 kg 739 gr “gashish”, 412 gr “marixuana” va 35 gr “opiy” — jami 11 kg 186 grammga teng giyohvandlik vositalari huquqbuzardan ashyoviy dalil sifatida olib qoʻyilgan.

Surishtiruvlar davomida aniqlanishicha, haydovchi tojikistonlik shaxsning buyurtmasiga binoan 2 ming AQSH dollari evaziga mazkur giyohvandlik vositalarini bojxona chegaralaridan olib oʻtishi va oʻz uyidagi bogʻga koʻmib qoʻyishi, keyinchalik tojikistonlik shaxsning oʻzi ushbu narkotik moddalarni olib ketishi rejalashtirilgan boʻlgan.

Hozirda mazkur holat yuzasidan Jinoyat kodeksining 246-moddasi bilan jinoyat ishi qoʻzgʻatilib tergov harakatlari olib borilmoqda.