Fargʻona shahriga yangi hokim tayinlandi

14:44 24 Yanvar 2022 Jamiyat
993 0

Bugun, 24-yanvar kuni Xalq deputatlari Fargʻona shahar Kengashining navbatdan tashqari sessiyasi boʻlib oʻtdi.

Sessiya ishida viloyat hokimi Xayrullo Bozorov, shahar kengashi deputatlari, viloyat va shahar hokimlarining oʻrinbosarlari, sektorlar, boshqarma va tashkilotlar rahbarlari, mahallalar raislari, jamoatchilik faollari, OAV vakillari ishtirok etdilar.

Sessiyada soʻz olgan viloyat hokimi Xayrullo Bozorov, shahar hokimi vazifasida ishlab kelgan Mirzohid Ubaydullayev Iqtisodiy taraqqiyot va kambagʻallikni qisqartirish vazirining oʻrinbosari – Mahallabay ishlash va tadbirkorlikni rivojlantirish agentligi direktori lavozimiga tayinlangani, sobiq shahar hokimi faoliyati samarali boʻlganligi, unga katta ishonch bildirilganligini aytib oʻtdi.

Viloyat rahbari, Fargʻona shahridagi oʻzgarishlar, imkoniyatlar, qilingan ishlar va oldinda turgan vazifalar haqida ham toʻxtalib oʻtdi.

Viloyat hokimi, Nazarov Vosiljon Shuxratovich nomzodini Fargʻona shahar hokimi lavozimiga tavsiya qildi. “Tashabbuskor, izlanuvchan rahbar, befarq emas, harakatchan, fidoyi, yosh kadrlardan biri”, — dedi Xayrullo Bozorov.

Tavsiya etilgan nomzod shahar kengashi deputatlari tomonidan bir ovozdan qoʻllab-quvvatlandi.

Vosiljon Nazarov 1984-yil Buvayda tumanida tugʻilgan. Toshkent davlat iqtisodiyot universitetini tamomlagan. 2006-yildan moliya tizimida mehnat qilib kelgan, 2019-2021yillarda viloyat moliya bosh boshqarmasi boshligʻi, 2021-yildan Bagʻdod tumani hokimi lavozimida faoliyat yuritib kelayotgandi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?