Botir MADIYOROV/“Xalq soʻzi”. Mamlakatimizda birinchilardan boʻlib Quva va Oʻzbekiston tumanida sharbatga toʻlib pishgan gilos jahon bozorlari, dunyoning eng yirik savdo tarmoqlariga eksport qilishga kirishildi.

— Ayni paytda Fargʻona viloyatida 49 ming gektar mevali bogʻlar mavjud, — deydi Quva tumanidagi “Turk” MFY raisi Zafarjon Sherboʻtayev. — Yangi bogʻlarning salmoqli qismiga gilos, shaftoli, oʻrik, olxoʻri, olma koʻchatlari ekilgan boʻlib, bu viloyatda meva eksporti salmogʻini yanada oshirish imkonini bermoqda. Xususan, oʻtgan yili viloyatda 15 ming tonna gilos eksport qilindi. Mirishkor bogʻbonlar tomonidan Turkiyadan jahon bozorida xaridorgir, eksportbop yangi navlar olib kelinib, mahalliy iqlim sharoitida moʻl hosil olinmoqda. Mahallada 1 ming 100 tonna sigʻimga ega 3 ta muzlatgichli omborxona tashkil etilgan. Bu gilos mevasini sifatli saqlash va xorij bozorlariga yetkazib berishda muhim ahamiyatga ega.

Shu tariqa hududdagi gilos bogʻlarida yiliga 1000 tonnaga yaqin gilos hosili yigʻib olinib, eksportga joʻnatiladi. Aytish joiz, 1015 ta xonadonda 5 ming nafardan ziyod aholi istiqomat qiluvchi “Turk” MFY ishsizlik va kambagʻallikdan xoli hudud sifatida eʼtirof etilgan.