Illyustrativ foto

Oʻzbekistonda “A” va “B” toifadagi haydovchilikka nomzodlar majburiy oʻquv dasturining nazariy qismini mustaqil oʻzlashtirishiga ruxsat beriladi. Bu haqda Vazirlar Mahkamasining “Transport vositalarini boshqarish tizimini yanada takomillashtirish chora-tadbirlari toʻgʻrisida”gi qarorida keltirilgan.

Qarorga koʻra, 2026-yil 1-fevraldan “A” va “B” toifadagi transport vositalarini boshqarish huquqini olish uchun talabgorlar haydovchilarni tayyorlash boʻyicha majburiy oʻquv dasturining nazariy qismini mustaqil oʻzlashtirishi mumkin boʻladi.

Bunda, talabgorlar:

• oʻz ixtiyoriga koʻra nazariy bilimlarni olish uchun oʻquv kurslarida (onlayn yoki oflayn shaklda) oʻqiydi yoxud mustaqil tayyorlanadi;

• majburiy oʻquv dasturida belgilangan amaliy mashgʻulotlarni avtomaktablarda toʻliq bajaradi;

• amaliy mashgʻulotlarda toʻliq qatnashgandan soʻng, haydovchilik guvohnomasini olish uchun nazariy va amaliy imtihonlarni topshiradi;

• amaliy mashgʻulotlardan oʻtgani haqidagi maʼlumotnoma elektron tarzda shakllantiriladi.

Hujjat bilan, “A” va “B” toifadagi transport vositalari haydovchilarini tayyorlash va qayta tayyorlash oʻquv guruhlarini Davlat yoʻl harakati xavfsizligi xizmatida roʻyxatga olish tartibi bekor qilinadi.

Shuningdek, 2026-yil 1-apreldan maxsus avtomatlashtirilgan foto va video qayd etish tizimlari orqali belgilangan tegishli yoʻl harakati qoidabuzarliklari uchun ham jarima ballari hisoblanadi. Jarima ballarini transport vositasining mulkdori va mazkur transport vositasidan fuqarolik-huquqiy munosabatlar asosida belgilangan tartibda (ishonchnoma, sugʻurta polisi, yoʻl varaqasi) foydalanuvchi boshqa haydovchilarga taqsimlash tartibi joriy etiladi.