Yashil xayriya jamgʻarmasini tashkil etish 30-noyabrdagi hukumatning tegishli qarori bilan tasdiqlandi. Hujjat bilan, mazkur xayriya jamgʻarmasi yuridik shaxs maqomiga ega boʻlmagan holda Ekologiya vazirligi huzurida tashkil etiladi.

2025-yilning 1-martidan boshlab jismoniy va yuridik shaxslar tomonidan ixtiyoriy ravishda xayriya toʻlovlarini “Yashil olam” va “Yashil toʻlov” elektron platformalari orqali amalga oshirish imkoniyati yaratiladi.

Mablagʻlar jamgʻarmada saqlanib, “Yashil makon” umummilliy loyihasi doirasida aholi buyurtmanomalari asosida daraxt ekish hamda mamlakatda ekologik holatni yaxshilash ishlariga yoʻnaltiriladi.

Shuningdek, loyiha doirasida daraxt va buta koʻchatlarini xarid qilish, yer maydonlarini tayyorlash, sugʻorish tizimini joriy etish hamda loyiha-smeta hujjatlarini ishlab chiqish moliyalashtiriladi.

Bundan tashqari, jamgʻarma mablagʻlari fuqarolar, maqsadli jamgʻarmalarning homiylik xayriyalari, “Yashil toʻlov” ustamalari, xalqaro moliya institutlari va donor tashkilotlar grantlari va boshqalar hisobidan shakllantiriladi.

Ekologiya vazirligiga ikki oy ichida Raqamli texnologiyalar vazirligi bilan mazkur platformalarni ishlab chiqish va ishga tushish topshirildi.