Chernogoriyaning Petrovas shahrida 20 yoshgacha boʻlgan shaxmatchilar oʻrtasida Jahon chempionati start oldi. Standart yoʻnalishda oʻtadigan musobaqa 11 turdan iborat boʻlib, ishtirokchilarga partiya davomida 90 daqiqa vaqt va har bir yurishdan soʻng 30 soniya qoʻshimcha vaqt beriladi. Ushbu nufuzli musobaqada Oʻzbekiston terma jamoasidan 11 nafar shaxmatchi ishtirok etmoqda.

Oʻgʻil bolalar oʻrtasidagi 1-turda grossmeyster Muhiddin Madaminov oq donalarda oʻynaganiga qaramay, reytingda oʻzidan pastda turuvchi hindistonlik Vedant Nagarkatt bilan durangga imzo chekdi. Muhammadzohid Suyarov esa qora donalarda ispaniyalik Roberto Florinni magʻlubiyatga uchratdi. Shuningdek, Asrorjon Omonov va Miraziz Matyoqubov ham musobaqani gʻalaba bilan boshlashdi.

Qizlar oʻrtasidagi bahslarda Oʻzbekiston yoshlar terma jamoasi muvaffaqiyatli start oldi. Yoshlar oʻrtasida ikki karra jahon chempioni Afruza Hamdamova qora donalarda serbiyalik Irina Vuyatovichni magʻlub etdi. Guldona Karimova chernogoriyalik Mateya Popovich ustidan gʻalabaga erishdi, Umida Omonova esa moldovalik Ana Petrisenkoni yengdi.

Maʼlumot uchun, ushbu jahon chempionati gʻoliblari grossmeyster unvonini qoʻlga kiritadi. Oʻzbekistonlik shaxmatchilarning musobaqadagi ishtiroklari mamlakatimizda shaxmat rivoji va yosh avlodning xalqaro maydondagi muvaffaqiyatlari uchun muhim ahamiyat kasb etadi.