Soʻx tumanida joylashgan chegara qoʻriqlash vzvodining ikki qavatli yangi maʼmuriy binosi hamda 28 xonadondan iborat 4 qavatli xizmat uyi tantanali ravishda foydalanishga topshirildi.

Shu munosabat bilan tashkil etilgan tadbirda Fargʻona viloyati hokimi, harbiy-maʼmuriy sektor rahbari Xayrullo Bozorov ishtirok etib, yigʻilganlarni ushbu qoʻshaloq xursandchilik bilan samimiy muborakbod etdi. Mamlakatimizda keyingi yillarda harbiy xizmatchilar va ularning oila aʼzolari uchun yaratib berilayotgan qulay sharoitlar alohida taʼkidlandi.

— Darhaqiqat, bugungi kunda harbiy xizmatchilar uchun barcha zamonaviy sharoitlar muhayyo etilmoqda, — deydi yangi uyga koʻchib oʻtgan Azamat Davronov va uning turmush oʻrtogʻi Sevara Egamberdiyeva. — Bunday eʼtibor va ragʻbat yurt tinchligi yoʻlida yanada gʻayrat-shijoat bilan ishlash, farzandlar kamolidan xotirjam boʻlishda muhim ahamiyatga ega.

Tadbir davomida oila sohiblariga yangi uylar kaliti topshirilib, xonadonda yaratilgan sharoitlar koʻzdan kechirildi. Fayzli dasturxon atrofida elu yurt tinchligi uchun duoga qoʻl ochildi.

Botir MADIYOROV

“Xalq soʻzi”.