Istam IBROHIMOV/“Xalq soʻzi”. Buxoro shahridagi 76-davlat maktabgacha taʼlim tashkilotida tarbiyalanayotgan jajji bolajonlar safi yanada kengaydi. Bu mazkur muassasa uchun 120 oʻrinli qoʻshimcha bino qurilgani bilan bogʻliq.

Yangi inshootda mashgʻulotlar olib borish xonalari, sport zali, yotoqxonalar joylashgan. Uning qurilishi uchun salkam 3 milliard soʻm mablagʻ sarflandi. Qoʻshimcha bino qurilishi ortidan mazkur tashkilotda 15 ta yangi ish oʻrni ham yuzaga keldi. Muhimi, yon-atrofda yashovchi yosh oilalarning bir tashvishi yengillashdi.

Aytish joizki, 2024-yilda investitsiya dasturi doirasida 1 ta yangi MTT barpo etildi, 8 ta MTTda rekonstruksiya, 1 tasida mukammal taʼmirlash ishlari olib borildi.

Umuman olganda, viloyatda mulkchilikning turli shaklidagi maktabgacha taʼlim tashkilotlari soni sezilarli darajada oshdi. Buni ushbu tashkilotlar saʼy-harakati bilan qoʻshimcha 7 683 ta bola oʻrni yaratilgani ham koʻrsatib turibdi. Ayni paytda 2143 ta maktabgacha taʼlim muassasasi faoliyat yuritmoqda. Ularda 3 – 7 yoshli bolajonlarning 86,4 foizi qamrab olingan.