Bugun, 29-oktyabr kuni Professional futbol ligasi tomonidan anʼanaviy tarzda oʻtkazib kelinadigan Oʻzbekiston kubogi musobaqasining final oʻyini boʻlib oʻtadi. Unda “Paxtakor” va “Buxoro” jamoalari turnirning bosh sovrini uchun maydonga chiqadilar. Bugun ushbu turnir haqidagi maʼlumotlarni koʻrib chiqamiz.

Oʻzbekiston kubogi turniri Oʻzbekiston Respublikasi mustaqilligini qabul qilib olgan yildan bir yil oʻtib, oʻtkazilishni boshlagan. Bu yilgacha musobaqa jami hisobda 32-marta tashkil etilgan. Faqatgina 1999-yil maʼlum sabablarga koʻra, turnir oʻtkazilmagan.

Oʻzbekiston kubogi turnirida eng koʻp gʻolib boʻlgan jamoa «Paxtakor« hisoblanadi. 2025-yilgi finalning nominal mezboni shu paytga qadar ushbu turnirda 13-marta bosh sovrinni qoʻlga kiritgan.

“Bunyodkor” va “Nasaf” klublari hisobida esa 4 tadan chempionlik sovrini bor. “Navbahor” va “Lokomotiv” jamoalari esa 3-martadan Oʻzbekiston kubogini boshi uzra yuqoriga koʻtargan.

Shuningdek, “Neftchi” klubida 2 ta, “Doʻstlik”, OKMK va “Andijon” jamoalarida 1 tadan chempionlik sovrini bor.

Bu yilgi finalchi “Buxoro” klubi oʻz tarixida birinchi bor musobaqaning finalida oʻynamoqda.

Musobaqaning dastlabki gʻolibi Namanganning “Navbahor« jamoasi hisoblanadi. «Lochinlar” 1992-yilgi musobaqa finalida Fargʻonaning “Temiryoʻlchi Qoʻqon” klubini penaltilar seriyasiga koʻra magʻlub etishga muvaffaq boʻlgan.

Turnirning bugungi kungacha soʻnggi gʻolibi esa “Andijon” klubi hisoblanadi. “Burgutlar” 2024-yili Fargʻonada boʻlib oʻtgan musobaqa finalida “Navbahor” jamoasini 3:2 hisobida magʻlub etib, musobaqaning bosh sovrinini qoʻlga kiritgan edilar.

Andijon shahri musobaqa finaliga mezbonlik qilayotgan 9-shahar hisoblanadi. Bungacha final bahslari Toshkent, Samarqand, Olmaliq, Fargʻona, Buxoro, Qarshi, Jizzax va Namangan shaharlarida boʻlib oʻtgan edi.

Qoʻshimcha maʼlumot sifatida, bugungi Oʻzbekiston kubogi finali soat 18:30 da start oladi.