BMT Bosh kotibining Markaziy Osiyo boʻyicha maxsus vakili va BMTning Markaziy Osiyo uchun Preventiv diplomatiya boʻyicha mintaqaviy markazi (UNRCCA) rahbari Kaxa Imnadze Namangan viloyatiga tashrif buyurdi.

Tashrif 17–18-sentyabr kunlari Namanganda boʻlib oʻtgan III Xalqaro “Kambagʻallikdan farovonlik sari” forumi doirasida tashkil etildi.

Kaxa Imnadze FAO va BMT Bosh kotibining Tinchlik qurish jamgʻarmasi tomonidan moliyalashtirilayotgan qoʻshma loyiha – “Qirgʻiziston va Oʻzbekistonning chegaradosh hududlarida hamkorlik orqali umumiy farovonlik” ishtirokchilari bilan uchrashdi. U uy xoʻjaliklari – benefitsiarlar faoliyati bilan tanishib, loyiha doirasida erishilgan natijalarni oʻrgandi.

Mazkur tashabbus Oʻzbekiston va Qirgʻiziston chegaradosh hududlarida ijtimoiy-iqtisodiy hamkorlikni rivojlantirish, mahalliy hokimiyat organlari, jamoalar va fuqarolik jamiyati oʻrtasida ishonchni mustahkamlash, shuningdek, ayollar va yoshlar uchun yangi imkoniyatlar yaratishga xizmat qilmoqda. Loyiha ishtirokchilari ilgʻor qishloq xoʻjaligi amaliyotlarining joriy etilishi, turmush sharoitlarining yaxshilanishi va qoʻshni hududlarda hamkorlikning mustahkamlanayotganini alohida qayd etdilar.

“Butun Markaziy Osiyo boʻylab koʻrib turibmizki, mamlakat ichidagi va mamlakatlar oʻrtasidagi hamkorlik insonlar va jamoalar hayotida aniq yutuqlarga olib kelishi mumkin”, — dedi Kaxa Imnadze.

Tashrif FAO Oʻzbekiston vakolatxonasi tomonidan UNRCCA, BMTning Oʻzbekistondagi Doimiy koordinatori idorasi va mahalliy hokimiyatlar bilan hamkorlikda tashkil etildi. Unda boshqa BMT agentliklari vakillari ham qatnashdilar.

Mazkur tashrif BMTning Oʻzbekiston va butun Markaziy Osiyoda tinchlik, hamkorlik va barqaror rivojlanishni taʼminlash borasidagi umumiy sadoqatini yana bir bor tasdiqladi.