Bugun, 22-noyabr kuni Ispaniya La Ligasining 13-tur uchrashuvlari start oldi. Turning markaziy bahslaridan birida “Barselona” oʻz maydonida “Atletik Bilbao” jamoasini qabul qildi.

Uchrashuvdagi hisob 4-daqiqadayoq ochildi. Robert Levandovski mavsumdagi sakkizinchi goliga mualliflik qildi.

Birinchi taymga qoʻshib berilgan daqiqalarda Ferran Torres farqni ikki pogʻonaga oshirdi. Shu tariqa ilk boʻlim “Barselona”ning 2:0 hisobiga ustunligi bilan yakunlandi.

Ikkinchi boʻlim boshida, 48-daqiqada Fermin Lopes mezbonlarning uchinchi golini kiritdi. Oʻyinning soʻnggi daqiqalarida esa Ferran Torres oʻzining ikkinchi golini urib, dublini rasmiylashtirdi. Bu — futbolchining joriy mavsumdagi ikkinchi dubli hisoblanadi.

Natijada “kataloniyaliklar” uchrashuvni 4:0 hisobida yirik gʻalaba bilan yakunlashdi. Ushbu natija orqali Hans Flik shogirdlari vaqtinchalik La Liga jadvali peshqadamligiga koʻtarildi.

Maʼlumot uchun, “Barselona” jamoasi keyingi oʻyinini Chempionlar Ligasi doirasida “Chelsi”ga qarshi oʻtkazadi. Uchrashuv 5-noyabr kuni boʻlib oʻtadi.