Minhojiddin MIRZO

EY, DOʻST

Ketgan bahorlarning qaytishi tayin,

Yana boychechaklar urib chiqar nish.

Bahoriy sabzalar entikar mayin,

Koʻrpasin koʻtarib keta boshlar qish.

Kuzgi xazonlarning ostidan yana

Gullar jon kirganday tirilar guyo.

Ayozlar ustidan qilib tantana

Ariqlar labida sheʼr oʻqir hulvo.

Beruhday tuyulgan daraxt novdasi

Bodroqday gullarga toʻlar begumon.

Najotday taralar bulbullar sasi

Ammo qaytmas ortga, qaytmaydi zamon....

Mangulik qoshida bir zumlik choʻgʻmiz,

Jon ham muvaqqatdir, umr bir nafas.

Fasllar qaytsa-da, qaytmas lahzalar,

Bir kun bor ochilar ruh tutqun qafas.

Ey ona tabiat,

Ey qodir Xudo!

Asli tuproq erur, azal ismimiz.

Bir kuni dunyoga aytgancha vido,

Yana tuproq boʻlar shaksiz jismimiz.

Shundaykan, oyogʻing ostiga qara,

Bobolar kaftida turibmiz, ey doʻst.

Koʻkraging bunchalar kermagil, asli –

Ularga suyanib yuribmiz, ey dust!

SUV UZRA OY AKSLANAR

Sokin kecha, oydin tun,

Maysazorlar shitirlar,

Yurak toʻrdagi ohu,

Oʻzin urib pitirlar.

Chigirtkalar jim qolar,

Kelar qadam tovushi...

Farishtaday nozanin

Qoʻllarida kovushi...

Sabo yelar ohista –

Shivirlaydi xabarchi,

Qurbaqalar qurillar,

Tundagi beor jarchi.

Suv uzra oy akslanar,

Uxlamaydi baliqlar,

Visol suratin koʻrib,

Qiqirlaydi ariqlar...

Shahboz FAYZULLAYEV

* * *

Anor suyi oqar...

Ey ufqi bedor,

vo kashshof samo –

zangori sochlari kaftimda gʻijim,

Yo yashil, zulfizar, homilador togʻlar

Toʻlgʻonar –

Daryo tugʻiladi bu kecha.

Kimsan ey, ajnabiy kapalak,

Bu sarboz tomchilar kimning elchisi?

Yigʻlama

Yo yashil,

yo yashil,

vo qushnoch daraxt,

bagʻringni tildimi

Tangri qamchisi –

Olov tugʻiladi bu kecha!

Yo yashil!..

Bunchalar oʻynaydi gʻujgʻon,

Gullagan koʻksimda ari uyasi.

Mehvaring boshimda –

ey naqqosh osmon,

Agar yoʻnar boʻlsang

jismimdan hosil –

Bir kuyrak nay qolur,

Boshqa hech narsa!

Yo xudo.

Yo yashil..

Yo sabr – ul daraxt...

Iroda RAHMONALIYEVA

Agar nurman, agar oftob,

Va yo yogʻdu va yo mahtob,

Na boʻlsam ham manim yakto

Madorim boʻl...

Agar gulgun, agar durkun,

Va yo soʻlgʻin va yo surgun,

Na boʻlsam ham, sen ey koʻrkim,

Harorim boʻl...

Agar qushman, agar xushman,

Va yo oʻngman va yo tushman,

Na boʻlsam ham dilim xushlar

Qarorim boʻl...

Agar tergar, agar sergap,

Va yo koʻksing tilar mergan

Na boʻlsam ham faqat senga

Bororim boʻl...