Foto: Reuters

Germaniya sogʻliqni saqlash vazirligi "AstraZeneca“ (Buyuk Britaniya/Shvetsiya) kompaniyasining ”COVID-19"ga qarshi vaksinasi atrofidagi vaziyatdan kelib chiqib oʻz qarorini qabul qildi. 

Bu haqda mamlakat sogʻliqni saqlash vaziri Yens Span maʼlum qildi. Uning soʻzlariga koʻra, mamlakatda mavjud boʻlgan vaksinalardan biri maʼlum bir yosh toifasi uchun katta xavf tugʻdirishi mumkin.

Qayd etilishicha, avvalroq Robert Kox instituti qoshidagi Emlash boʻyicha doimiy komissiya (STIKO) “AstraZeneca” vaksinasini qoʻllash boʻyicha tavsiyalarini oʻzgartirgan. Uning xulosasiga koʻra, preparat faqat 60 yoshdan oshganlarga moʻljallangan. Komissiyaning fikriga koʻra, preparat kamdan-kam hollarda emlashdan keyin 4-16 kun ichida tromboz holatlariga olib kelishi mumkin, asosan ushbu yosh chegarasidan past boʻlgan bemorlarda.

Shu bois 30-mart kuni Germaniyada “AstraZeneca” vaksinasi faqat 60 yoshdan katta odamlar uchun qoʻllanilishi maʼlum qilindi. 

Ushbu qaror Yens Span va uning federal shtatlardagi hamkasblari ishtirok etgan konferensiyada qabul qilindi. Ushbu yosh chegarasidan kichik boʻlgan fuqarolar mazkur vaksina bilan oʻzlarining sogʻligʻi holatini shifokor baholagandan keyingina va toʻliq maʼlumotlardan soʻng individual xavf tahlili holatida olishlari mumkin.