Oliy Majlis Qonunchilik palatasi Spikeri birinchi oʻrinbosari Akmal Saidov 23-oktyabr kuni Oʻzbekiston Respublikasi Prezidenti saylovini kuzatish maqsadida mamlakatimizga tashrif buyurgan Osiyo Parlament Assambleyasi Bosh kotibi Muhammad Rezo Majidiy bilan uchrashdi.

A.Saidov mehmonlarni samimiy qutlab, hozirgi murakkab sharoitga qaramay Muhammad Rezo Majidiyning Oʻzbekiston Respublikasi Prezidenti sayloviga xalqaro kuzatuvchi sifatida ishtirok etishini mamlakatimizda amalga oshirilayotgan islohotlarga boʻlgan ijobiy munosabat, deya eʼtirof etdi.

Uchrashuvda keyingi yillarda xalqimiz, mamlakatimiz hayotida, jamiyatimizda, milliy saylov qonunchiligida ulkan oʻzgarishlar yuz bergani, bu davrda respublika hayotining ijtimoiy-siyosiy va iqtisodiy sohalarida xalq farovonligini yuksaltirishga yoʻnaltirilgan izchil islohotlar, saylovlarni ochiq va oshkora oʻtkazish boʻyicha yaratilgan sharoitlar haqida soʻzlab berildi.

Ilk bor Saylov kodeksi asosida oʻtadigan Prezident saylovida konstitutsiyaviy qoidalar va xalqaro saylov standartlariga binoan Oʻzbekiston Respublikasining Prezidenti, yaʼni davlat rahbari davriylik prinsipi asosida saylanishi taʼminlanishi, mamlakatimizda siyosiy partiyalar soni yana bittaga koʻpayib, partiyalararo raqobat sezilarli darajada kuchaygani qayd etildi.

Shuningdek, Oliy Majlis Qonunchilik palatasining qonunchilik faoliyati, norma ijodkorligi, Qonunchilik palatasidagi siyosiy partiyalar fraksiyalari, 12 ta qoʻmita va 4 ta komissiyaning ish uslublari hamda parlamentarizm sohasidagi yangiliklar haqida maʼlumotlar berildi.

Muloqot davomida saylovlarning ochiqligi va oshkoraligini taʼminlashda xorijiy davlatlar vakillari, xalqaro tashkilotlarning kuzatuvchilari ishtiroki muhimligi inobatga olinib, saylovlarda mingdan ortiq xorijiy kuzatuvchilar va koʻplab ommaviy axborot vositalari kelgani taʼkidlab oʻtildi.

Muhammad Rezo Majidiy samimiy va iliq mehmondorchilik uchun minnatdorlik bildirib, Osiyo Parlament Assambleyasi bugungi kunda 56 ta davlat parlamentlarini birlashtirib turganligini, ularning 44 tasi mazkur nufuzli tuzilmaga toʻlaqonli aʼzoligi, 12 tasi esa kuzatuvchi sifatida ishtirok etayotganini bildirdi. Ayniqsa, Oʻzbekistonning saylov qonunchiligini yanada takomillashtirish borasidagi dadil qadamlari, bu boradagi amaliy saʼy-harakatlari eʼtiborga molik ekanini qayd etdi.

Shuning barobarida, saylovga tayyorgarlik koʻrish va uni oʻtkazish jarayoni bilan yaqindan tanishgani, saylovlarda qoʻllanilayotgan zamonaviy axborot texnologiyalar saylov jarayonidagi ochiqlik va oshkoralikni taʼminlagan holda, saylovchilarga yanada qulay sharoitlarni yaratishga xizmat qilishini taʼkidladi.

Muloqotda saylovoldi kampaniyasining yuqori darajada tashkil etilayotgani odamlarga munosib nomzodni tanlashga yordam berishi bilan birga, saylov jarayonining ochiq, oshkora va shaffof hamda xalqaro standartlarga mos, demokratik tamoyillar asosida oʻtishiga ishonch bildirildi.

Uchrashuvda Oliy Majlis Qonunchilik palatasi va Osiyo Parlament Assambleyasi oʻrtasidagi hamkorlikni yanada kuchaytirish masalalari ham muhokama qilindi.