2025-yil 11-may kuni AQSH va Xitoy oʻrtasida Jeneva shahrida oʻtkazilgan savdo muzokaralari yakunida tomonlar tariflar masalasida muhim kelishuvga erishdi. Bu haqda AQSH delegatsiyasi rahbari Jeymison Grir maʼlum qildi. Uning soʻzlariga koʻra, kelishuv tafsilotlari bugun rasman eʼlon qilinadi.

Muzokaralarda Xitoy tomonidan Davlat kengashi raisining oʻrinbosari Xe Lifen boshchilik qildi. Muzokaralardan soʻng Xitoy vakillari izoh bermagan boʻlsa-da, Grir bergan bayonotda AQSH prezidenti Donald Tramp tomonidan ilgari surilgan savdo balansidagi milliy xavfsizlik tahdidi yuzasidan eʼlon qilingan favqulodda holatni yumshatish yoʻlida bu kelishuv muhim qadam boʻlishi aytildi.

Grir bayonotida: “Biz Xitoy bilan erishilgan bitim milliy favqulodda holatni yumshatishda yordam beradi, deb ishonamiz”, — deya taʼkidladi. Ekspertlarga koʻra, muzokaralarning ikki tomonlama tahlili shuni koʻrsatdiki, taraflar oʻrtasidagi kelishmovchiliklar dastlab taxmin qilingan darajada jiddiy emas. AQSH moliya vaziri Skott Bessent bu muloqotni “muhim yutuq” deb atadi. Bu fikrni Xitoy vakili Xe Lifen ham qoʻllab-quvvatladi.

Muzokaralardan soʻng AQSH prezidenti Donald Tramp “Truth Social” platformasida bergan bayonotida Xitoy bilan “toʻliq qayta yuklash” boshlanganini aytdi. “Bugun Shveysariyada Xitoy vakillari bilan juda samarali uchrashuv boʻlib oʻtdi. Koʻplab masalalar muhokama qilindi, muhim kelishuvlarga erishildi. Doʻstona va konstruktiv muhitda AQSH-Xitoy munosabatlarini yangilashga doir shartlar kelishib olindi. Biz Xitoyning AQSH biznesiga ochiqligini istaymiz. Bu juda katta yutuq!” — deb yozdi Tramp.

Eslatib oʻtamiz, AQSH tomonidan Xitoydan import qilinadigan mahsulotlarga qoʻyilgan boj stavkalari umumiy hisobda 145 foizni tashkil etadi, Xitoyning javob tariqasidagi boj stavkalari esa 125 foizga yetgan. Pekin ilgariroq ochiq bayonot bilan savdo urushi “oxirigacha” davom etishini maʼlum qilgan va Vashingtonni xalqaro tartibni “yovvoyi oʻrmon qonuniga” qaytarmaslik haqida ogohlantirgan edi.