Saminjon HUSANOV/“Xalq soʻzi”. Shu yilning 20-iyulidan boshlab “Andijon—Xonobod” yoʻnalishida poyezd qatnovi yoʻlga qoʻyiladi. U Andijon shahridan soat 06:45 da, Xonobod shahridan 17:30 da yoʻlga tushadi. Harakat davomida “Yangi Andijon”, “Jalaquduq”, “Savoy” hamda “Maʼmurobod” bekatlarida toʻxtab, Andijon, Jalaquduq, Qoʻrgʻontepa tumanlari hamda Qorasuv shahri aholisiga ham xizmat koʻrsatadi.

— Prezidentimiz joriy yilda Andijonga tashrifi chogʻida “Andijon—Xonobod” yoʻnalishida yoʻlovchi poyezdi qatnovini yoʻlga qoʻyish boʻyicha topshiriq bergan edi, — deydi viloyat “Nuroniylar” uyushmasi rahbari Oʻktamjon Oxunov. — Navroʻz bayrami arafasida “Qoʻqon—Andijon” yoʻnalishida harakatlanuvchi poyezd oʻz qatnovini “Andijon—Xonobod” yoʻnalishi boʻyicha ham davom ettira boshladi. Qoʻshimcha harakatning joriy etilishi ichki sayyohlik salohiyatini oshirishga xizmat qiladi. Andijon shahridan 70 km. uzoqlikda joylashgan Xonobod shahri sayyohlik markazi sifatida rivojlanib bormoqda. Xonobod shahrida boʻlib oʻtadigan “II Dunyo sadolari” xalqaro milliy estrada sanʼati festivali ishtirokchilari doirasida yoʻlovchilar soni keskin ortishini inobatga olsak, yangi poyezd qatnovi ayni muddao boʻldi.