Foto: AP

Italiya futboli afsonasi Alessandro Nesta mahalliy «Monza»ga yangi bosh murabbiy etib tayinlandi.

48 yoshli sobiq futbolchi «Fiorentina»ga koʻchib oʻtgan Raffaele Palladinoning oʻrnini egallamoqda. Bu Nestaning A Seriyada bosh murabbiy sifatidagi birinchi mavsumining boshlanishini anglatadi.

Nesta oʻzining futboldagi yorqin faoliyatiga qaraganda kamtarona menejerlik karyerasiga ega. U avval «Perudja», «Frozinone» va «Redjana» kabi jamoalarni boshqargan.

Yakunlangan mavsumni u «Redjana» bilan Italiyaning ikkinchi ligasida 11-oʻrinda yakunladi.

«Monza» kabi klubni boshqarishni unga ishonib topshirilishi afsonaviy himoyachining murabbiylikda katta futbolga qaytganini anglatadi.

«Monza» yakunlangan mavsumda A Seriyani 12-oʻrinda yakunladi. U Yevropa klublari oʻrtasidagi nufuzli turnirlarda qatnashishga daʼvogar hisoblanmasada, jamoaviy oʻyin va barqaror hujum chizigʻiga ega jamoa sifatida tanilgan.

Alessandro Nesta futbolchi sifatida koʻplab sovrinlarga ega chiqqan. «Latsio»da u bir marta A Seriya, ikki bor Italiya kubogi, 2-marta mamlakat Superkubogi, 1-marta UYEFA Kubogi egalari kubogi gʻolibi boʻlgan. «Milan»da esa 2-marta A Seriya, 1-marta mamlakat kubogi, 2-marta Superkubogi, 2-marta UYEFA Chempionlar ligasi gʻolibligini qoʻlga kiritgan.

Terma jamoa bilan 2006-yilgi jahon chempionati va 21 yoshgacha boʻlgan futbolchilar oʻrtasidagi Yevropa chempionati(1996-yil)da gʻolib chiqqan.