Foto: Reuters

Dunyoning aksariyat mintaqalarida jazirama issiq kuzatilayotgan shu kunlarda Janubiy Afrika Respublikasida kuchli qor yogʻdi.

Tabiatning bu kutilmagan inʼomi koʻplab noqulayliklarni keltirib chiqardi. Jumladan, yoʻllar toʻsib qoʻyildi, yuz minglab odamlar elektr energiya taʼminotidan uzilib qoldi. Bundan tashqari, suv toshqinlari va boʻronli shamollar mamlakatning bir qancha viloyatlarini qamrab olgan. Eng yomon vaziyat Sharqiy Keyp va Kvazulu-Natalida kuzattilmoqda.

Tabiiy ofat tufayli 500 mingga yaqin uy elektr taʼminotidan uzilib qoldi. O. R. Tambo viloyatida suv toshqini kamida yetti kishining hayotiga zomin boʻldi.

Kuchli qor yogʻishi natijasida yoʻllar toʻsib qoʻyilgan, bir necha kilometr uzunlikdagi tirbandliklar yuzaga kelgan. Yoʻllarning sirpanchiqligi sababli trassasida sodir boʻlgan yoʻl-harakat hodisasi oqibatida yana besh kishi halok boʻldi.

Janubiy Afrika qirgʻoqlari yaqinida boʻron va baland toʻlqinlar tufayli kemalar navigatsiyada qiyinchiliklarga duch kelmoqda. Odatda iyun oyida Janubiy Afrika Respublikasida qishki ob-havo kuzatilsa-da, bu safar halokatli boʻlmoqda. Sinoptiklar buni iqlim oʻzgarishi bilan izohlamoqda, bu esa mintaqada tabiiy ofatlarning chastotasi va jiddiyligini oshirmoqda.