Foto: DXX

Joriy yilning noyabr oyida xalqaro terroristik tashkilotlarga aloqadorligi uchun 25 yildan ortiq qidiruvda boʻlgan Oʻzbekiston Respublikasi fuqarosi xorijda ushlanib, mamlakatga olib kelindi. Bu haqda Davlat xavfsizlik xizmati xabar berdi.

Qayd etilishicha, Oʻzbekiston Respublikasi Davlat xavfsizlik xizmati tomonidan chet el maxsus xizmatlari bilan hamkorlikda tezkor-qidiruv tadbirlari olib borilgan. Tadbir natijasida ushlangan ushbu shaxs diniy ekstremistik oqim gʻoyalarini qoʻllab-quvvatlab, “hijrat” va “jihod” qilishni maqsad qilgan.

U 1999-yilda Oʻzbekistondan chiqib ketgan hamda Afgʻoniston, Pokiston va Suriya davlatlari hududlaridagi xalqaro terroristik tashkilotlar safida jangovar harakatlarda ishtirok etgan. Oʻzganing nomiga rasmiylashtirilgan soxta hujjatlar asosida yashirinib yurgan mazkur shaxs MDHga aʼzo davlatlardan birida qoʻlga olingan.

Hozirda unga nisbatan Jinoyat kodeksining 154- (yollanish), 155- (terrorizm), 159- (Oʻzbekiston Respublikasining konstitutsiyaviy tuzumiga tajovuz qilish) va boshqa moddalari bilan qoʻzgʻatilgan jinoyat ishi doirasida tergov harakatlari olib borilmoqda.