“Milliy kinematografiya sohasi ijodkorlari, mutaxassislari va xodimlarini uy-joy bilan taʼminlash chora-tadbirlari toʻgʻrisida”gi Vazirlar Mahkamasi qarori loyihasi muhokamaga qoʻyildi

Loyihada keltirilishicha, prezidentning oʻtgan yil 20-noyabrdagi «Oʻzbekfilm» kinostudiyasiga tashrifi davomida milliy kinematografiya sohasi ijodkorlari, mutaxassislari va xodimlari uchun koʻp qavatli ikkita turar-joy binosini qurish va bozor tamoyillariga asoslangan ipoteka kreditlarini ajratish vazifasi topshirilgan.

«Oʻzbekfilm» DUK hududidan ikkita koʻp qavatli uy-joylarni qurish uchun yer maydoni ajratilgan.

Toshkent shahar hokimligi qonunchilikda belgilangan tartibda ikkita 9 qavatli uy-joylarni qurish uchun tender savdolari orqali bosh loyihachi va pudratchi tashkilotlarini tanlab oladi.

Uy-joylar 2021-yilning 31-dekabriga qadar foydalanishga topshiriladi.

Qurilgan uylarning (maydonining) 20 foizi bepul «Oʻzbekfilm» DUKga xizmat uylari sifatida beriladi.

Koʻp kvartirali uy-joylar qurilishi yakunlanishi bilan uy-joyning tayyor kvartiralari faqatgina milliy kinematografiya sohasi ijodkorlari, mutaxassislari va xodimlari uchun bozor tamoyillariga asoslangan ipoteka kreditlari orqali beriladi.

“Oʻzbekkino” Milliy agentligi «Oʻzbekfilm» DUK hududida quriladigan koʻp kvartirali uy-joylar qurib bitkazilgandan soʻng bir oylik muddatda turar joy sharoitlarini yaxshilashga ehtiyoji bor, kamida 5 yil shu sohada faoliyat yuritgan milliy kinematografiya sohasi ijodkorlari, mutaxassislari va xodimlari roʻyxatini shakllantirib, ularga kvartiralar ajratish boʻyicha shaxsiy javobgarlik yuklanadi.