Foto: AP

Shu yilning 14-iyun kuni Germaniya federal farmatsevtika uyushmalari ittifoqi butun mamlakat boʻylab norozilik kuni eʼlon qildi. Shu bois mamlakatdagi aksariyat dorixonalar yopiq.

“Germaniya federal farmatsevtika uyushmalari ittifoqi 14-iyunni umummilliy norozilik kuni deb eʼlon qildi. Shu kuni yetkazib berish faqat shoshilinch dorixonalar orqali amalga oshiriladi. Dorixonalarni yopishdan tashqari, davlat dorixonasi Uyushmalar va palatalar oʻz pozitsiyalarini aholiga yetkazish uchun Germaniyaning koʻplab hududlarida markazlashgan tadbirlarni rejalashtirgan”, deyiladi ittifoq saytida.

Namoyishlar mamlakatning koʻplab shaharlarida, jumladan Berlin, Dyusseldorf, Myunster, Visbaden, Marburg va Augsburgda boʻlib oʻtmoqda.

Namoyishchilar dorixonalarga qoʻshimcha moliyaviy yordam va byurokratik tizimni soddalashtirishni talab qilmoqda.

Germaniya sogʻliqni saqlash vaziri Karl Lauterbax oʻzining “Tvitter”dagi sahifasida Berlindagi idorasi oldidagi norozilik namoyishi suratini joylashtirdi. Unda oq xalat kiygan va bannerlar koʻtargan yuzlab odamlar aks etgan.

“Deutsche Apotheker Zeitung” gazetasining politsiyaga tayanib xabar berishicha, Berlindagi namoyishda 3800 nafarga yaqin odam qatnashgan.

Avvalroq, Germaniyada uzoq vaqt davomida dori-darmonlar, jumladan antibiotiklar, ogʻriq qoldiruvchi vositalar, bolalar uchun siroplar va saratonga qarshi dori vositalari yetkazib berishda uzilishlar kuzatilayotgani xabar qilingan edi. Qayd etilishicha, aprel oyida mamlakatda 480 nomdagi dori-darmon taqchilligi kuzatilgan.

Oʻz navbatida, Germaniya federal tibbiyot palatasi hukumatni xorijdan dori-darmonlarni yetkazib berishda uzoq vaqt davom etayotgan uzilishlar fonida hayotiy muhim dori vositalarining milliy zaxirasini yaratishga chaqirdi.