Foto: Халқ сўзи

Prezidentimizning sanoatlashgan hududda tadbirkorlik uchun shart-sharoitlarni yanada yaxshilash, investitsion jozibadorligini oshirish maqsadida Navoiy viloyatiga “erkin iqtisodiy zona” maqomini berish toʻgʻrisidagi topshirigʻiga asosan hududdagi yuzga yaqin korxonaga 120 dan ortiq loyiha boʻyicha erkin iqtisodiy zona ishtirokchisi maqomi berilgan edi. Mazkur loyihalarning umumiy qiymati qariyb 1 milliard AQSH dollari atrofida boʻlib, shundan toʻgʻridan-toʻgʻri xorijiy investitsiyalar – salkam 300 million dollarni tashkil etadi. Shu kunga qadar faoliyatini toʻliq boshlagan loyihalar asosida 5000 mingdan ortiq doimiy ish oʻrinlari yaratilgan.

Mazkur loyihalarning amalga oshirilishida hududning investitsiyaviy jozibadorligi bilan birga viloyat eksportchilar uyushmasining tashabbuskorligi ham muhim omil boʻlmoqda. Xususan, yaqinda uyushma raisi Sardor Gʻaffarovning tashabbusi bilan AQSH va Koreyadan investorlar taklif etilib, viloyat hokimi vazifasini bajaruvchi Normat Tursunov tomonidan qabul qilindi.

Muzokaralar davomida amerikalik investor Isaak Tomas bilan Navoiyda elektrokar zavodi qurilishiga kelishildi. Shuningdek, koreyalik investorlar bilan oʻzaro hamkorlikni yoʻlga qoʻyish boʻyicha bir qator loyihalar muhokama qilindi. Shu asosda hududning eksport imkoniyatini oshirishga yoʻnaltirilgan bir qator mega loyihalarga start beriladi.

Temur ESHBOYEV, “Xalq soʻzi”.