Oʻzbekiston geografiya jamiyati aʼzolarining navbatdan tashqari yigʻilishi boʻlib oʻtdi va bunda jamiyat yangi raisi tayinlandi. Iqtisod fanlari falsafa doktori (PhD) Oybek Kabiljanovich Norinbayev bir ovozdan Oʻzbekiston Geografiya jamiyati raisi etib saylandi.

Oʻzbekiston geografiya jamiyati 120-yildan ortiq tarixiga ega boʻlib, geografik tadqiqotlarni tashkillashtirish va muvofiqlashtirish, geograflarning ilmiy asarlarini nashr etish, va geografik bilimlarni targʻib qilish kabi muhim vazifalarni bajarib kelmoqda, jamiyat tomonidan oliy oʻquv yurtlari bilan hamkorlikda qator xalqaro ilmiy amaliy konferensiyalar tashkil etilmoqda. Bugungi kunda Oʻzbekiston Geografiya jamiyati tomonidan yirik ilmiy-tadqiqot loyihalari va ommabop ilmiy loyihalarni amalga oshirish rejalashtirilgan.

Oybek Kabiljanovich Norinbayev 2018-2021-yillarda Oʻzbekiston Respublikasi Innovatsion rivojlanish vazirining oʻrinbosari lavozimida mehnat faoliyatini olib borgan, bunga qadar respublikamizning bir qator tijorat banklarida samarali mehnat qilib, Qishloq qurilish bank hamda Asaka bankda rais oʻrinbosari lavozimlarida, shuningdek, Oʻzmilliybankda turli rahbar lavozimlarida ishlab kelgan.