Illyustrativ foto

Joriy yilning 3-aprel kuni Adliya vazirligi tomonidan Oliy taʼlimga oid idoraviy hujjat davlat roʻyxatidan oʻtkazildi (roʻyxat raqami 3807). Mazkur Nizom oliy taʼlim tizimini tashkil etish, taʼlim jarayoni, boshqaruv, moliyaviy munosabatlar hamda talabalar va pedagog xodimlarning huquq va majburiyatlarini belgilaydi.

Unga koʻra, oliy taʼlim bakalavriat va magistratura bosqichlarida amalga oshiriladi. Bakalavriat taʼlimi kamida 3-yil davom etadi. Oʻqish muddati:

• sirtqi taʼlimda – kamida 1-yilga,

• kechki taʼlimda – kamida yarim yilga uzaytiriladi.

Oliy taʼlim kunduzgi, sirtqi, kechki, masofaviy, dual va boshqa shakllarda tashkil etiladi. Taʼlim jarayoni milliy kredit-modul tizimi asosida yoʻlga qoʻyilib, u Yevropa kredit transfer tizimi (ECTS)ga moslashtiriladi.

Bitiruvchilarning mehnat bozori talablariga mos boʻlishi uchun oʻquv dasturlari ish beruvchilar bilan hamkorlikda ishlab chiqiladi.

Talabalarni taʼlimga aloqador boʻlmagan ishlarga jalb etish taqiqlanadi. Shuningdek, oliy taʼlim tashkilotlariga akademik, tashkiliy va moliyaviy mustaqillik beriladi.